文本一覽
文本一覽
海陸腔
味道
有一種味道，毋係用舌嫲嚐得出，係用心肝正感受得著
有一種味道，毋係嚐過就記入心，係隨時就會刺在心肝頭，毋會毋記得
阿姆日日㧡水供豬，愛顧一屋大細食著
歸日舂頭磕額，菜湯腳刻耐仔攪飯，這苦煎煎个日仔
到細人仔一日過一日大了後正轉甜，這係阿姆个味道
阿爸逐日汗流脈絡，為了家庭疲爬極蹶煞猛做事，底衫總係潦潦
記得還細時節，有一擺作燒，阿爸背等𠊎去分先生看
頭那凴等阿爸賁賁闊闊个背囊，有一種燒暖个幸福
鼻著該鹹丟丟个汗水 味，係𠊎熟識个阿爸个味道
...
海陸腔
阿婆个菜園
𠊎婆戴在竹東落去，五指山裡背山林壁壢角个半山排
該係𠊎最愛去个所在，也係𠊎最想念个位所
從細細開始，斯愛堵著尞日，阿爸斯駛車仔，載阿姆還過𠊎三姊妹
行過彎彎斡斡个山路，跋過一隻大崎，車仔停在半山排鄰舍 个禾埕
阿爸牽𠊎摎老妹，阿姆揇老弟
再過慢慢仔行一截石碫仔，在一間伙房屋大門前停下來
禾埕肚晒鹹菜个阿婆看著𠊎兜一屋人 轉來，笑咪咪行過來開大門
嘴肚緊念：「恁早呢！」這間紅磚屋，係阿公摎阿婆戴个位所，也係阿爸个胞衣跡
見擺到尞日，阿婆知𠊎兜會轉去看佢
...
海陸腔
椰仔樹
老屋个禾埕脣，種幾下頭椰仔樹，生到三棧樓恁高
阿公用鉛線網圍等椰仔園，不准𠊎兜落去尞
驚怕椰仔葉無斯細椰仔跌下來，會擲著細人仔个頭那
逐下晝日頭轉影咧，椰仔葉摎西曬个日光遮等
放尞日𠊎兜會兜楯頭，坐在禾埕尾个樹影下聽阿公講古
講頭擺發大水崩河頭，大水打對佐仔閣莊來
浸死盡多人，家家戶戶都囥在茅屋頂高
有兜人蹶上椰仔樹頂高囥，椰仔樹又乜救著當 多分大水打到浮浮胖胖个老百姓
記得，高天天个椰仔樹，樹影下無愁無慮个臨暗，有阿公講都講毋忒个傳仔
...
海陸腔
攔牛驚魂
人類个好朋友斯係狗
𠊎相信當多人長下聽著抑係看著摎狗有關个真實故事
毋過除了狗以外，人類个好朋友就係牛
以前台灣係農業社會，莊下人大部分係耕種
因為科技無發達，項項斯愛靠人力
所以逐家屋畜牛係當平常个事情
像犁田、拖車、載穀、載菜、載禾稈這兜較重个事頭
全愛靠牛來完成
人摎牛斯像兄弟姐妹樣，乜係屋下个一丁
...
海陸腔
阿姆个菜園角
阿姆个菜園角，有一頭葉仔花
該葉仔花，原本單淨係一細截 个樹枝，分人細心細意个插在菜園角
佢像種佢个人共樣恁牛，毋驚熱天發風搓、毋驚天公做大水，做佢緊生緊高、緊大緊靚
到佢有半人恁高个時節
阿姆就去倒幾支堅韌个桂竹，插在佢脣頭分佢递
佢緊递緊暢、緊递緊高，递到屋簷恁高
長下開到滿樹，桃紅色个花
探得著屋簷个花，還毋甘願，像係自家會尋路樣，又續等递
递到二樓阿姆間房个窗門前，還知好莫遮著阿姆个窗門
...
海陸腔
遮仔
無聊个落水天，一隻人無落無著
企在門前看等路町擎等遮仔上上下下个人
有帶走帶走緊觸觸仔个，也有定定仔行享受雨中散步个
有一儕人擎支遮仔孤栖、孤栖个，也有兩儕扳等肩頭共下抵一支遮仔个
𠊎心肝肚想：「一遮一世界，遮仔底下一定囥等盡多故事。」
看等門角企等像一條瓜个遮仔，撐開來，就係𠊎心肝肚个一蕊花
還細時節，在街路看著一支紅色間青花个細遮仔
愛到奈毋得，先先阿姆嫌忒細支抵水毋著毋肯買
毋過看𠊎目汁含等，最尾還係買分𠊎
...
海陸腔
檳榔樹
還細該下，屋下田肚有種檳榔樹
對田頭到田尾一行一行種到筆直
行摎行之間有留引、排水个水壢
橫行又乜一頭一頭挷直線種，看起來嶄蠻靚
阿爸講行摎行个闊度種一丈闊，做事行路較方便
種菁仔樹退行時，逐頭个距離就種八尺闊
橫直闊度愛種罅來，另日樹仔大咧
葉仔摎葉仔正毋會相唚，割檳榔菁个割篙鐮正過得得
逐年五月份到九月份，爺哀五更早就䟘床去菁園割菁仔
...
海陸腔
菜瓜
記得，阿婆好種菜，佢喊阿爸在屋面前搭瓜棚來種菜瓜
菜瓜當會打，長下自家食毋去，還做得送分鄰舍
該兜鄰舍當愛食阿婆種个菜瓜，又萋又甘甜
逐年正月半以前，阿婆斯會摎自家點个菜瓜秧種落瓜棚下
佢日日用心照顧，幼幼个菜瓜秧，當遽抽高、递藤
阿婆逐日會去巡菜瓜棚，驚怕當當递个嫩芽，分風吹㪐忒
佢會細心細意摎瓜藤牽轉瓜棚下，用索仔略略固定在豆籬町
分佢好順利爬往上，兩、三禮拜過，菜瓜藤斯递到棚頂咧
五、六月，菜瓜當會開花、當會打
...
海陸腔
身影
年正過忒，春水落無停，冷颼颼仔1！
看等加兩日就愛開學上臺北，屋下還無半點錢，毋知愛仰結煞正好？
想無計咧！無奈何，阿爸講來去摎阿明伯先撥兜看啊！
阿明伯係車頭个副驛長，月月有月給，兼開礱間
又輒輒貌炭仔請人燒，𠊎爸就係長透分佢請去燒炭个工人
該日朝晨，打早七點零，水正落過，天還曚曚，歸路濕溚溚，熟熟个路
哪有麼个心情去欣賞水後个景致
阿爸背等𠊎个皮箱行頭前，𠊎擐等包袱跈在後背，衫袋肚袋無兩銑錢
去到阿明伯屋下，阿明伯親暱暱行等出來
...
詔安腔
炕窯
打早，即聽著阿媽交代阿依，去市場打一垤豬肉、買一尾萋魚轉來
「啊，怪奇！係麼儕做生日？」問過阿媽正知
係滿姑討轉外家，難怪阿媽恁歡喜！
䀴滿姑討轉來个時間，𠊎走去莊頭阿惜姨个雜貨店等，𠊎頭勾勾直頭䀴
姑丈个車吂駛偎，𠊎即走出去擛手啊，姑丈車一擋恬𠊎即跋上車
滿姑即笑講：「屎朏吂坐燒，即愛落車啊，恁多時間！」
知佢歡喜，𠊎尖入車底即和姑表姊妹大聲賞起來
滿姑隨个等路足餳人，逐儕攏有一份
車後斗猶有一大布袋个番薯
...
詔安腔
味素
有一種氣味，毋係用舌食會出，係用心肝正感受會著个
有一種氣味，毋係食過即記入心，係隨時即會連到心肝頭，毋會添放去个
阿依逐日擔水供豬，愛顧歸屋下大細食著
歸日舂頭磕額，菜湯尾刻耐攪飯，這苦篤篤个日子
到細子一日一日大了後正轉甜，這係阿依个氣味
阿怙逐日流汗溚滴，為著家庭犁頭戴鑊，煞著做事，內底衫總係濕漉漉
記得細漢時有一擺發燒，阿怙揹𠊎去得醫生䀴
頭那凴在阿怙賁賁闊闊个背脊骿，有一種燒暖个福氣
鼻著遐鹹篤篤个汗味，係𠊎熟事个阿怙个氣味
...
詔安腔
阿媽个菜園
𠊎媽蹛在竹東落去五指山內底山林壁角个半山骿
遐係𠊎頭愛去个所在，嘛係𠊎頭思念个所在
自細細起，若有堵著歇睏日，阿怙即駛車，載阿依猶擱𠊎三姊妹
行過彎彎斡斡个山路，跋過一個大崎，車歇在半山骿隔壁个禾坪
阿怙牽𠊎和阿妹，阿依攬阿弟
擱來慢慢行一截石礹，在一間大落屋大門前擋恬
禾坪底炙鹹菜个阿媽䀴著𠊎人歸火灶轉來，微微笑行過來開大門
嘴著面講：「恁早哦！」這間紅磚屋，係阿公和阿媽蹛个所在，嘛係阿怙个血跡
見擺到歇睏日，阿媽知𠊎人會轉去䀴佢
...
詔安腔
椰子樹
舊屋个禾坪脣，種幾下頭椰子樹，生有三層樓恁高
阿公用鉛線網圍椰子園，毋得𠊎人入去尞
驚椰子葉抑細粒椰子跌落來，會搉著細子人个頭那
逐日下晝日頭徙影啊，椰子葉拁西照个日頭光遮蹛
歇睏日，𠊎人會擔凳，坐在禾坪尾有影个所在，聽阿公講古
講成過做大水崩溝，大水對佐子閣莊來
蔭死真多人，逐火灶攏閃到茅屋面上
有一兜人跋起去椰子樹面上，椰子樹嘛救著真多得大水打到浮浮沉沉个老百姓
記得，高天天个椰子樹，樹影下無擘無心个烏昏，有阿公講嘛講毋會煞个古
...
詔安腔
攔牛驚魂
人類个好朋友即係狗
𠊎相信真多人恬會聽著抑係䀴著和狗有關个真實故事
毋過狗以外，人類个好朋友即係牛
成過臺灣係農業社會，莊下人大部分係作穡
因為科技無發達，一步步攏愛靠人力
所以逐火灶供牛即真普通个事情
大討犁田、拖車、載穀、載 菜、載禾稈這兜真重个事頭
攏愛靠牛來做
人和牛即像兄弟姊妹共款，嘛係屋下个一員
...
詔安腔
阿依个菜園角
阿依个菜園角，有一頭九重葛
遐九重葛，本底正係一細截个樹椏定，得人斟酌細義插在菜園角
佢像種佢个人共款恁牛，毋驚熱天做颱風，毋驚天公做大水，做佢越生越高，越大越靚
到佢有半個人恁高个時
阿依即去裁幾下支較韌个桂竹，插在佢个脣頭，得佢递
它越爬越暢通、越來越高，爬到屋簷那麼高
不時開到歸頭樹桃紅色个花
探會著屋崠个花，猶毋甘願，像係自家會尋路共款，又直頭递
递到二樓阿依房間个窗子門前，猶知好莫遮著阿依个窗子門
...
詔安腔
雨傘
無聊个落雨天，一個人無著無落
企在門前䀴街路擎雨傘來來去去个人
有半行半走緊掣掣个，嘛有款款子行享受雨中散步个
有一個人擎一支雨傘孤單、孤單个；嘛有兩儕捍肩頭共下擎一支雨傘个
𠊎心肝底想：「一傘一世界，雨傘矮下一定藏有真多故事。」
在門角企蹛像一條瓜个雨傘，打開，即係𠊎心肝底个一蕊花
猶細漢時務，在街路䀴著一支紅色摻青花个細支雨傘
愛到堵毋會核。打先阿依嫌傷細支，遮雨毋會過，毋肯買
毋過䀴𠊎目汁含蹛，落尾猶係買得𠊎
...