文本一覽
文本一覽
詔安腔
第十課
飛鼠个心聲
目珠圓又圓，尾溜長又長
日時樹空藏，暗時走山崗
𠊎即係蹛在臺灣山崠尾个飛鼠
在海拔三百公尺到三千公尺个山底
都有𠊎人个腳跡
𠊎日時頭藏在樹空內歇睏
暗頭正出來尋嫩葉和果子食
在這位，鳥子唱歌得𠊎聽
...
四縣腔
𤌍窯仔
打早，就聽著阿婆吩咐阿姆，去市場割兜仔豬肉、買兜仔萋魚轉來
「欸，恁古怪！有麼人做生日係無？」問過阿婆正知
係滿姑愛轉妹家，怪毋得阿婆恁歡喜！
探著滿姑轉來个時間，𠊎走去莊頭阿惜姨个雜貨店等，𠊎頭勾勾仔緊眺望
姑丈个車仔吂駛兼，𠊎 就走出去擛手哩，姑丈車仔一頓恬
𠊎就蹶上車，滿姑笑等講：「尸朏吂坐燒，就愛下車吔，恁大閒情！」
知佢歡喜，𠊎尖入車肚就 同姑表姊妹仔大聲搞起來
滿姑帶个等路異餳人，逐儕都有一份以外
車後斗還有一大布袋个番薯
...
四縣腔
味道
有一種味道，毋係用舌嫲試得出，係愛用心肝正感受得著
有一種味道，毋單淨試過就記入心，係隨時就會揬著心肝頭，毋會分人添放忒
阿姆日日㧡水、餵豬仔，愛顧一屋大小食著
歸日仔舂頭磕額，菜湯腳刻耐仔攪飯，這苦篤篤个日仔
到細人仔日見日大了後正轉甜，這係阿姆个味道
阿爸逐日汗流脈落，為著家庭疲爬極蹶煞猛做事，厥底衫仔總係溚潦
得還細時節有一擺作燒，阿爸背等𠊎去分先生看。
吾頭那凴等阿爸賁賁闊闊个背囊，有一種燒暖个幸福
鼻等該鹹渧渧仔个汗水味，係𠊎熟事个阿爸个味道
...
四縣腔
阿婆个菜園
吾婆歇在竹東落去五指山裡背山林壁壢角个半山排
該係𠊎最好去个所在，也係𠊎最想念个位所
從細細仔開始，總愛堵著尞日，阿爸就會駛車仔，載阿姆還過𠊎三姊妹
行過彎彎斡斡个山路，蹶一隻大崎，正摎車仔停在半山排鄰舍个禾埕
阿爸牽𠊎摎老妹、阿姆揇老弟
再過慢慢仔行一截石碫仔，在一間伙房屋大門前停下來
禾埕肚晒等鹹菜个阿婆看著𠊎兜一家人轉來，笑咪咪仔行過來開大門
嘴項緊講：「恁早呢！」這間紅磚屋，係阿公摎阿婆歇个所在，乜係阿爸个胞衣跡
見擺到尞日，阿婆知𠊎兜會轉去看佢
...
四縣腔
椰子樹
老屋个禾埕脣，種幾下頭椰子樹，生到三棧樓恁高
阿公用鉛線網圍等椰仔園，不准𠊎兜入去尞
驚怕椰仔葉無就細椰子係跌下來，會擲著細人仔个頭那
逐下晝日頭轉影，椰子葉將西晒个日光遮等
放尞日𠊎兜會兜楯頭，坐在禾埕尾个涼跡項聽阿公講古
講頭擺發大水崩河頭，大水打對佐仔閣莊來
浸死盡多人，家家戶戶都跋上茅屋頂高
有兜人跋上椰子樹頂高囥，椰子樹乜救著盡多分大水打到浮浮冇冇个老百姓
記得，高天天个椰子樹，樹影下無愁無慮个臨暗頭，有阿公講都講毋忒个傳仔
...
四縣腔
攔牛驚魂
狗仔係人類个好朋友
𠊎相信異多人輒常聽著抑係看著摎狗仔有關个真實故事
若係講除忒狗仔以外，人類个好朋友怕就係牛仔
以前臺灣係農業社會，莊下人大部分都係耕種
因為科技無恁發達，項項都愛靠人力
故所，逐家都畜牛仔係異平常个事情
大體犁田、拖車、載穀、載菜、載禾稈這兜較重个事頭
都愛倚恃牛仔來完成
人摎牛仔就像係兄弟姊妹仔共樣，牛仔乜算係屋下个一丁。
...
四縣腔
阿姆个菜園角
阿姆个菜園角，有一頭葉仔花
該花，原本單淨係一細截个樹枝仔，分人細心細意个插在菜園角
佢像種佢个人共樣恁牛，毋驚熱天發風搓、毋驚天公做大水，做佢緊生緊高、緊大緊靚
到佢有半個人恁高个時節
阿姆就去倒幾支仔堅韌个桂竹，插在厥脣頭分佢递
佢緊递緊暢、緊递緊高，递到屋簷恁高
不時開到滿樹，桃紅色个花
探得著屋簷个花，還毋甘願，像係自家會尋路樣仔，又續等递
递到二樓阿姆間房个窗門前，還知毋好遮著阿姆个窗門
...
四縣腔
遮仔
無聊个落水天，一儕人無落無著
企在門前看等路項擎等遮仔上上下下个人
有帶行帶走緊拚拚仔个，也有定定仔行享受雨中散步个
有一儕人擎支遮仔孤栖孤栖个，也有兩儕扳等肩頭共下抵一支遮仔个
𠊎心肝肚想：「一遮一世界，遮仔底下一定囥等盡多故事。」
囥在門角企等像一條瓜仔个遮仔，撐開來，就係𠊎心肝肚个一蕊花
還細時節，在街路看著一支紅色間等青花个細遮仔
愛到奈毋得，先前阿姆嫌忒細支抵水毋著毋肯買
毋過看𠊎目汁含等，最尾還係買分𠊎
...
四縣腔
檳榔樹
還細該下，屋下田坵仔有種檳榔樹
對田頭到田尾一行一行仔種到筆直
行同行之間有留蔭水、放水个水壢
橫行又乜一頭一頭个挷直線種，看起來嶄然靚
阿爸講，行同行个闊度種一丈闊，做事行路較方便
種菁仔樹退行時，每一頭个距離就種八尺闊
橫直闊度愛種罅擺來，另日樹仔大吔
葉仔同葉仔正毋會相唚仔，割檳榔菁个割篙鐮正過吔得
每年五月份到九月份，爺哀五更早就䟘床去菁園割菁仔
...
四縣腔
菜瓜
記得，阿婆好種菜，佢喊阿爸在屋面前搭瓜棚來種菜瓜
菜瓜當會打，長透自家食毋忒，還做得送分鄰舍
該兜鄰舍當愛食阿婆種个菜瓜，又萋又甜
逐年正月半之前，阿婆就會同自家點个菜瓜秧種落瓜棚下
佢日日用心照顧，幼幼个菜瓜秧，當遽挷高、递藤
阿婆逐日會去巡菜瓜棚，驚怕當在該递个嫩芽，分風吹㪐忒
佢會細心細意同瓜藤牽轉瓜棚下，用索仔略略仔固定在豆隸竹項
分佢好順利跋往上，兩、三禮拜過，菜瓜藤就递到棚頂哩
五、六月仔，菜瓜當會開花、當會打
...
四縣腔
身影
年正過忒，春雨落無停，寒咻咻仔！
看等加兩日就愛開學上臺北，屋下還無半點錢，毋知愛仰結煞正好？
愐無計哩！無奈何，阿爸講來去摎阿明伯先撥兜仔看啊！
阿明伯係車頭个副驛長，月月有月給，兼開礱間
又輒輒貌炭仔請人燒，吾爸就係長透分佢請去燒炭个工人
該日朝晨，打早七點零，雨正落過，天還濛濛，歸路濕溚溚仔，熟熟个路
哪有麼个心情去欣賞雨後个景致
阿爸摎𠊎背等皮箱行頭前，𠊎擐等包袱跈在後背，衫袋肚袋無兩點錢。
去到阿明伯屋下，阿明伯親暱暱仔行等出來
...
大埔腔
𤌍窯
打早，斯聽著阿奶交代阿姆，去市場割兜豬肉、買兜萋魚轉來
「欸，古怪！有麼人做生日係無？」問過阿奶正知
係滿姑愛轉妹家，怪得阿奶恁歡喜！
探著滿姑轉來个時間，𠊎走去莊頭阿惜姨个柑店等，𠊎頭勾勾緊吊望
姑丈个車吂駛偎，𠊎斯走出去擛手咧， 姑丈車一頓恬𠊎斯蹶上車
滿姑笑緊講：「屎朏吂坐燒，斯愛落車咧，恁大閒情！」
知佢歡喜，𠊎擠入車肚斯同姑表姐妹大聲搞起來咧
滿姑帶个等路已餳人，逐儕都有一份
車後斗還有一大布袋个番薯
...
大埔腔
味瑞
有一種味瑞，毋係用舌嫲嚐得出，係用心肝正感受得著
有一種味瑞，毋係嚐過斯記入心，係隨時都會觸著心肝頭，毋會毋記得
阿姆日日㧡水畜豬，愛顧一屋家大細食著
歸日無閒濟借，菜尾將就攪飯食，這艱苦个日
到細人日見日大了後正轉甘，這係阿姆个味瑞
阿爸逐日汗流脈絡，為著家庭疲爬極蹶煞猛做，底衫罕得燥
記得還細時節有一擺發燒，阿爸背核𠊎去分醫生看
頭那凴在阿爸賁賁闊闊个背囊項，有一種燒暖个幸福
鼻著該鹹纖鹹纖个汗水味，係𠊎熟事个阿爸个味瑞
...
大埔腔
阿奶个菜園
吾奶戴在竹東入去五指山裡背山林壁壢角个半山排
該係𠊎盡好去个所在，也係𠊎盡想念个位所。
自細，見若堵著尞日，阿爸斯駛車，載阿姆同吾三姊妹
行過彎彎斡斡个山路，過跋一條大崎，車停到半山排鄰舍个禾埕
阿爸牽𠊎同老妹，阿姆揇老弟
過再行一截石碫，在一間伙房屋个大門前停落來
晒穀場裡晒鹹菜的奶奶看到我們一家人回來，笑咪咪的走過來開大門
嘴肚緊念，「恁早呢」！這間紅磚屋，係阿爹同阿奶戴个所在，也係阿爸个胞衣跡
見擺到尞日，阿奶知吾這兜會轉去看佢
...
大埔腔
椰子樹
老屋家个禾埕脣，種幾下頭椰子樹，生來有三層樓屋恁高
爹用鉛線網圍緊椰子園，不准吾等入去尞
驚怕椰子葉無斯細椰子跌落來，會𢫦著細人个頭那
逐下晝日頭轉影咧，椰子葉將西曬个日光遮核
放尞日吾等會兜楯頭，坐在禾埕尾个涼跡項聽阿爹講古
講頭擺出大水崩崁頭，大水打對佐閣莊來
浸死已多人，家家屋屋都走上茅屋頂高
有兜人跋上椰子樹頂高，椰子樹又乜救著當多分大水打去浮浮滂滂个老百姓
記得，高天天个椰子樹，樹影下無愁無慮个臨暗，有阿爹講都講毋撇个傳
...
大埔腔
攔牛驚魂
人類的好朋友係狗
𠊎相信真多人輒輒聽著無斯看著同狗有關个真實故事
毋過除了狗以外，牛乜係人類个好朋友
以前台灣係農業社會，莊下人大部分係耕田人
因致科技無發達，項項都愛靠人力
所以逐家屋畜牛係真平常个事
大到犁田、拖車、載穀、載菜、載禾稈這兜真重个事頭
做下愛靠牛來做
人同牛斯像兄弟姐妹共樣，牛算來乜係屋家个一員
...