文本一覽
文本一覽
南四縣腔
田頭田尾趣妙多
「唧唧唧、唧唧唧」麼个東西噭唧唧？土狗？草蜢？𠊎輕手輕腳行兼去
唉！佢等嗄禁聲吔，電線頂高个禾鷝仔相等𠊎，又乜恬索索仔！
仰仔講呢？𠊎毋係人客，嗄有該勞攪著人壞勢个心情
開聲一喊：「阿爸，𠊎歸來吔！」聲一出，嗄來嚇走一陣鳥仔
臨暗个日頭，柔柔仔閃到山背去，留著霞光滿天，靚到毋知愛仰仔講哦！
屋脣个兩坵田，係祖公業，這下盡好價，毋過阿爸毋盼得賣核佢
用天然个方式，阿爸年年蒔田收穀，礱个精米、糙米
歇城市个阿叔、做生理个阿伯、阿姑、叔婆，聚概分有份
田脣、田角阿婆就會加減種兜仔菜，因致田坵長年無射藥仔
...
詔安腔
老屋邊
蹛在城市，隔壁屋邊相堵頭，頭多即笑笑、頕下頭，無麼个有相借問
即算日時頭，儕儕嘛門關關个罕得來去，䀴著恁，𠊎特別會想著細漢時个老屋邊
成過𠊎蹛在莊下个街市，屋邊多，大家恬會這伙灶行行、遐伙灶尞尞
像對門做西裝个矮師傅屋下，大家即真愛去
大人會去討一兜布尾來補衫褲，細子即撿兜布截來辦家貨
夜時頭大人做閒啊，即在佢个店屋簷下歇涼、答嘴鼓
一陣細子即坐在做西裝个長桌崠寫作業、讀書，即像自家屋下共款
相對門猶有一間阿德伯个布店，店內底花剌必駁个布，滿足餳人
𠊎人輒輒去䀴哪垤布較靚，到阿依過家尞个時，即揪佢去剪布做衫
...
詔安腔
還神請人客
正月十五元宵節，莊底个媽祖廟遐暗夜，子時會祭拜天公來祈福
祈求保護風調雨順、國泰民安，莊个人身體康健
到秋收了後，舊曆十月十五前後，廟會舉辦真大場个祭拜儀式
來答謝各路神明保護莊底百姓順序平安
有求即愛有還，這個儀式𠊎人講做「還福」，嘛有人講做「還願」
「還福」係六堆客莊个大件事，進前兩日，夫娘人頭無閒，愛做龜粄
龜粄毋係單單拜神用个，猶愛用龜粄去請嫁出去个阿姑、姑婆
猶有阿依外家个親親戚戚來得𠊎人請，所以愛做全然多个龜粄
做粄个時，阿依做粄，𠊎人細子愛鬥相共燸火，鑊底个水滾無幾久
...
詔安腔
雲
有一擺出國去尞，足好運个得𠊎坐在飛機个窗門脣
遐日，天氣真好，䀴出去堵好係，青青个天白白个雲──青天白雲
遐值討得人添放个記憶，做一擺得𠊎攏䀴著啊
深深刻印在𠊎个頭那底，嘛不時會出現在夢境內底
遐雲个色地仰子會恁靚～，有白白像真好食个綿綿冰、棉花糖，嘛有像軟軟會得人燒暖个白棉花
有个像阿佅恁得人惜想討偷唚一下紅霞紅霞个面頰卵
猶有各種無共樣形象个款式，有像觀音娘坐在蓮花座上騰雲
嘛有像關公手擎青龍偃月刀大戰外星 人
有像高大高大个山，嘛有像好額人个大瓦屋、皇宮，猶有像走足緊个車、馬
...
詔安腔
苦瓜个味素
猶記得𠊎做細子个時，一到歇熱放暑假，𠊎人六個細子真愛和阿怙共下去菜園做事
𠊎怙真樂暢，歸路講笑事、歸路唱山歌，足樂暢个，連上屋个滿叔公、滿叔婆䀴著嘛會跈在唱山歌
講著有影哦，「散人毋使多，兩斗米即會唱歌」
阿怙个菜園種真多菜，韭菜花、湯匙菜、番薯葉、茄、高麗菜
猶有細子定著毋食个苦瓜，阿怙伸手捋兩條苦篤苦篤个苦瓜囥在籃內底
斡過頭拁𠊎人細子講：「阿秀、阿德，你䀴這苦瓜彎彎翹翹个紋路
即像人生个過程，坎坎坷坷；特別个味素，即係人生个劇本，苦甘苦甘。」
𠊎人兄弟姊妹聽毋識，戇戇企个
阿依在脣頭䀴著嗄好笑拁阿怙講：「樹老心空，人老即顛倒。你拁十歲个細子講這兜，佢敢聽有？
...
詔安腔
弓蕉旗
民國四五十年个時，𠊎个舊屋蹛在弓蕉市場脣頭
遐弓蕉市場係青果合作社用來收貨、出貨个所在
記得遐下䀴著「弓蕉旗」个時，滿哪位个蕉農做一下會擔弓蕉來這位交
弓蕉市場个泥下面上排到淰淰个弓蕉
在遐個年代，若弓蕉顧了靚，會用外銷去日本，即提會著較好个價數
臺灣種个弓蕉香擱甜，型靚又飽米，日本人真安𧩣，長在會對臺灣進口弓蕉
毋過日本人買弓蕉个時間無定著，載弓蕉个船期嘛無一定
弓蕉市場一半下一禮拜有兩、三日會用收弓蕉，一半下一禮拜正收一、兩日定
遐睏子吂有電話，討知合作社哪時會收弓蕉，有弓蕉討交个作穡人
...
詔安腔
阿公个三種身分
客莊係阿公个出生地，蹛到今偎八十年啊
阿太係學老人，因為食頭路个關係，即在這個莊頭生根啊
阿公屋下六姊妹，細漢起頭學講事个時，阿太即教學老事
三、 四歲了後，尋隔壁个細子伴賞，佢人做一下係客人
一日到暗賞作垺，毋使人教，無幾久即真會喋啊，顛倒華語係讀國民學校正學个
阿公班上有外省人、學老人，嘛有客人，哪種人佢攏合會來
因為講事無麼个腔口，所以即有人問佢到底係學老人，抑係客人？
嘛有人挑持問佢係毋係「阿山仔」？阿公生做高䠷高䠷，面長長，白淨白淨
確實有外省人个形體，了後做兵、食頭路、參加各種活動，攏得人有這三種身分个疑問
...
詔安腔
百香果
歇睏日，和屋下个人共下去遊山賞水，在路脣䀴著有幾下擔作穡人在賣自家種个菜
即行向前去遶遶䀴䀴，有炙到黃黃个筍干、烏到出油个老菜脯
有金黃色飽米个甜番麥、青青个竻瓜、柑紅色个金瓜、生來像青色玫瑰花个高麗菜
青青个香櫞瓜、各色个甜椒，猶有有特殊香味个山當歸、山胡椒
這兜又靚又萋个菜像在相拚，擛手討餳人去買
菜攤頭前，猶有用紅色細網袋裝一袋一袋个百香果
遐深茄色帶有細黃點个外皮猶略略仔皺皺，恬恬等會曉欣賞佢个有緣人
想起細漢个時，食無這下恁豐沛，一擺歇睏
阿哥招𠊎和阿弟共下去大圳背个竹林內底捋野生百香果
...
詔安腔
灌煙腸
臘月，擱過無一個月即係過年啊！
物質欠少个年代，討食無恁利便，家家戶戶若有閒，總係會利用這過年前
準備一兜過年會用著个年貨，做一兜臘肉、豬膽肝，內底頭餳人个即係煙腸
在臺灣南部六堆所在，到偎年時務，雨水少、日頭原在像熱天恁猛
這時，係來做臘肉、抑係灌煙腸攏係頭好个時務。因為田底事這下較少
阿媽頭愛在這站，加減做一兜仔臘肉和煙腸，好在過年个時有豐沛个菜色
𠊎頭愛拁阿媽鬥相共灌煙腸，好賞又好食
遐兜灌好个煙腸又會用囥真久，等到開學討讀書个時，隨飯包又會用加一件菜
灌煙腸个時，阿媽會先拁賣豬肉个鏡福叔公買幾下斤後腿个豬肉，佢嘛會加買一兜仔肥肉
...
詔安腔
祕密基地
逐年寒天，𠊎會去行屋下後背个一條山路，這條山路頭前站匡紅泥
䀴起來即像一條普通个產業道路定，無麼个怪奇
毋過，跋上山崠，變做泥路了後，這條山路黏時即變成𠊎个祕密基地
見擺行入這位，𠊎歸個人即變到十分輕鬆快活
這條路得大樹和竹遮到密密，炙毋會著麼个日頭
泥下舖淰淰跌落來个樹葉和竹葉，有一兜樹、竹橫在路頭
有一兜石頷和路脣个石䃗崩落去，歸條路䀴起來即知無麼个人行
這下，會行這條路个人，大討即係撥工來行山路運動个人
𠊎來這，除了運動以外，猶會用感受這片山林个恬靜
...
詔安腔
田頭田尾齣頭多
「唧唧唧、唧唧唧」麼个物件在唧唧唧？土狗？草蜢？𠊎輕手輕腳行偎去
唉！佢人嗄禁聲啊，電線面上个屋簷鳥相準𠊎，嘛係恬卒卒！
仰子講呢，𠊎毋係人客，嗄有遐吵著人个否勢心情
大聲一喊：「阿怙，𠊎轉來啊！」聲一出，嗄來驚走一陣鳥
討暗个日頭，慢慢閃到山背去，留落紅霞滿天，靚到堵毋會核哦！
屋脣个兩塱田，係祖產，這滿真好價，毋過阿怙毋盼得拁佢賣莫
用天然个方式，阿怙年年蒔田割禾，𤲍个白米、糙米
蹛城市个阿叔、做生理个阿伯、阿姑、叔婆，做一下攏有份
田脣、田角阿媽即會加減種一兜菜，因為田底長年無射藥
...
饒平腔
老鄰舍
戴在都市肚，隔壁鄰舍相堵頭，最多就笑笑仔、頷下頭，無麼个有相借問
就算日時頭，儕儕也閂門閉戶罕得來往，䀴著恁樣，𠊎特別懷念細人仔該下个老鄰舍
頭擺𠊎戴在鄉下个莊頭肚，鄰舍多，大家長透這家行行、該家尞尞
像對門做西裝个矮師傅屋下，大家就盡愛去
大人會去討兜布頭布截來補衫褲，細人仔就拈兜布碎來份家啦
暗晡頭大人做閒咧，就在佢个店亭下尞涼、打嘴鼓
一群細人仔就坐在做西裝个長桌頂寫作業、讀書，就像自家屋下樣
對門還有一間阿德伯个布店，店肚花剌必駁个布，非常餳人
𠊎兜輒輒去䀴哪垤布較靚，到阿姆過家尞該下，就拉等佢去剪布做衫
...
饒平腔
還福請人客
正月十五元宵節，庄肚个媽祖廟該暗晡子時會祭拜天公來祈福
祈求保佑風調雨順、國泰民安、庄民身體健康
秋收過後，舊曆十月十五邊仔，廟項會舉辦盛大个祭拜儀式
來搭謝各路神明保佑庄肚百姓順序平安
有祈就愛有還，這儀式𠊎兜講「還福」
還福係六堆客家庄个大事，前兩日，婦人家盡無閒，愛做紅粄
紅粄毋係淨敬神用个，還愛用紅粄去邀請嫁出去个阿姑、姑婆
還有阿姆外家頭个親親戚戚來分𠊎兜請，所以愛做當多紅粄
打粄个時節，阿姆做粄，𠊎兜細人仔愛𢯭手燒火，鑊頭水滾無幾久
...
饒平腔
雲
有一擺出國去尞，恁好彩，分𠊎坐在飛行機窗門脣
該日，天氣當好，䀴往出，阿姆哀正得，青青个天、白白个雲──青天白雲
該強強分人毋記得个記憶，做一擺分𠊎䀴著咧
深深刻印在𠊎个腦膈肚，不時會出現在夢中
該雲个色彩仰會恁靚～，有白白像當好食个綿綿冰、棉花糖，也有像軟軟會分人燒暖个白棉花
有个像嬰兒恁得人惜，想愛偷唚一下紅霞紅霞个面頰卵
還有各種無共樣形投个款式，有像觀音娘坐在蓮花座上騰雲
也有像關公手擎關刀大戰外星人
有像高高大大个山，乜有像青堂瓦舍个屋、皇宮，還有像走當遽 个車仔、馬
...
饒平腔
苦瓜个味緒
還記得𠊎做細人个時節，一到避暑放尞，𠊎兜六個細人仔當好摎阿爸共下去菜園做事
𠊎爸當樂線，一路講笑科、一路唱山歌，盡暢樂，連上屋个屘叔公、屘叔婆䀴著也跈等唱山歌
講斯有影哦，「窮人毋使多，兩斗米就會唱歌」
阿爸个菜園種當多菜，韭菜花、湯匙白、番薯葉、茄、高麗菜
還有細人仔一等毋好食个苦瓜，阿爸伸手摘咧兩條苦督苦督个苦瓜，放在籃仔肚
反過頭摎𠊎兜細人仔講：「阿秀、阿德，你䀴這苦瓜彎彎翹翹个紋路
就像人生个過程，坎坎坷坷；特別个味緒，就係人生个劇本，苦苦甘甘。」
𠊎兜兄弟姊妹聽毋識，戇戇企等
阿姆在邊唇䀴著好笑就摎阿爸講：「樹老心空，人老就癲倲。你摎十歲子講這兜，佢敢聽有？
...
饒平腔
弓蕉旗
民國四、五十年該下，𠊎老屋戴在弓蕉市場脣頭
該弓蕉市場係青果合作社用來收貨、出貨个所在
記得該下見到「弓蕉旗」个時節，滿哪个蕉農做下會㧡弓蕉來這位繳
弓蕉市場个地泥下擺到淰淰个弓蕉
在該隻年代，若係弓蕉顧著靚，做得外銷去日本，斯提得著較好个價數
臺灣種个弓蕉香又甜，型款靚又飽米，日本人當阿𧩣，長透會對臺灣進口弓蕉
毋過日本人買弓蕉个時間無定著，載弓蕉个船期也無一定
弓蕉市場成下一禮拜有兩、三日會收弓蕉，成下一禮拜正收一、兩日定
該下吂有電話，有弓蕉愛繳个農民，想知合作社哪時會收弓蕉
...