文本一覽
文本一覽
詔安腔
檳榔樹
𠊎猶細个時，屋下田底有種檳榔樹
對田頭到田尾一行一行種到直直
行和行中央有留引、排水个溝
橫行又嘛一頭一頭揪直線種，䀴起來嶄然靚
阿怙講行和行个闊度留一丈闊，做事行路較利便
種檳榔樹退時行个時，逐頭相離即留八尺闊
橫直闊度愛留得佢罅，另日樹大頭啊
葉和葉正毋會相唚，割檳榔个長勾鐮正過會過
逐年五月份到九月份，爺母五更早即跋起來去檳榔園割檳榔
...
詔安腔
薍薺
記得，阿媽愛種菜，佢喊阿怙在屋下頭前搭瓜棚來種薍薺
薍薺真會打，不時自家食毋會去，猶會用送得屋邊
遐兜屋邊真愛食阿媽種个薍薺，萋萋擱甘甜
逐年正月半進前，阿媽即會拁自家點个薍薺秧種落瓜棚下
佢逐日用心照顧，幼幼个薍薺秧，真緊抽高、递藤
阿媽逐日攏會去巡薍薺棚，驚正在递个嫩芽，得風吹㪐去
佢會小心細義拁瓜藤牽轉瓜棚下，用索略略固定在豆籬面上
得佢好順利跋起來，兩、三禮拜過，薍薺藤即递到棚崠啊
五、六月，薍薺真會開花、真會打
...
詔安腔
身影
年正過，春雨落無歇，寒搐搐！
䀴加兩日即討開學上臺北，屋 下猶無半點錢，毋知愛仰子正好？
想無步啊！無奈何，阿怙講來去拁阿明伯先撥兜䀴望！
阿明伯係車頭个副站長，逐個月有月俸，兼開□米間
又恬恬貌炭請人燒，𠊎怙即係不時得佢請去燒炭个工人
遐日晨早，打早七點外，雨正落過，天猶濛濛，歸路濕溚溚。熟熟个路
哪有麼个心情去欣賞落過雨个景色
阿怙拁𠊎揹皮箱，行頭前，𠊎擐包袱跈在後背，衫袋內底袋無兩點錢
去到阿明伯屋下，阿明伯真好禮行出來
...
饒平腔
𤌍窯
打早，斯聽著阿嬤交代阿姆，去市場割兜豬肉、買兜萋魚轉來
「欸，古怪！有麼人做生日係無？」問過阿嬤正知
係滿姑愛轉外家，怪毋得阿嬤恁歡喜！
探著滿姑轉來个時間，𠊎走去莊頭阿惜姨个雜貨店等，𠊎頭勾勾緊眺望
姑丈个車吂駛偎，𠊎斯走出去擛手咧，姑丈車一頓恬𠊎斯蹶上車
滿姑笑等講：「屎朏吂坐燒，斯愛下車咧，恁大閒情！」
知佢歡喜，𠊎尖入車肚斯摎姑表姐妹大聲爽起來
滿姑帶个等路異餳人，逐儕都有一份外
車後斗還有一大布袋个番薯
...
饒平腔
味道
有一種味道，毋係用舌嫲嚐得出，係用心肝正感受得著
有一種味道，毋係嚐過就記入心，係隨時就會觸着心肝頭，毋會輕放忒
阿姆日日㧡水供豬，愛顧一屋大細食著
歸日舂頭磕額，菜湯腳刻耐仔攪飯，這苦篤篤个日仔
到細人仔日見日大了後正轉甜，這係阿姆个味道
阿爸逐日汗流脈絡，為了家庭疲爬極蹶煞猛做事，底衫總係溚潦
記得細个時節有一擺作燒，阿爸背等𠊎去䀴醫生
頭那凴等阿爸賁賁闊闊个背囊，有一種燒暖个幸福
鼻著該鹹渧渧个汗水味，係𠊎熟事个阿爸个味道
...
饒平腔
阿嬤个菜園
𠊎嬤戴在竹東落去五指山裡背山林壁壢角个半山排
該係𠊎最愛去个所在，也係𠊎最想念个位所
從細細開始，斯愛堵著尞日，阿爸斯駛車仔，載阿姆還過𠊎三姊妹
行過彎彎斡斡个山路，跋過一隻大崎，車仔停到半山排鄰舍个禾埕
阿爸牽𠊎摎老妹，阿姆揇老弟
再過慢慢仔行一截石碫仔，在一間伙房屋大門前停下來
禾埕肚炙鹹菜个阿嬤䀴著𠊎兜一家人轉來，笑咪咪行過來開大門
嘴肚緊念，「恁早呢」！這間紅磚屋，係阿公摎阿嬤戴个所在，也係阿爸个胞衣跡
見擺到尞日，阿嬤知𠊎兜會轉去䀴佢
...
饒平腔
椰仔樹
老屋下个禾埕脣，種幾下頭椰仔樹，生啊三層樓屋恁高
阿公用鉛線網圍等椰仔園，不准𠊎兜入去尞
驚怕椰仔葉無就細椰仔跌下來，會擲著細人仔个頭那
每下晝日頭轉影咧，椰仔葉將西箭日遮等
放尞日𠊎兜會兜楯頭仔，坐在禾埕尾个涼樹下聽阿公講古
講頭擺發大水崩河頭，大水打對佐仔閣莊來
浸死盡多人，家家戶戶都囥在茅屋頂高
有兜人跋上椰仔樹頂高囥，椰仔樹又乜救著當多分大水打到漂漂冇冇个老百姓
記得，高天天个椰仔樹，樹影 下無愁無慮个臨暗，有阿公講都講毋忒个傳仔
...
饒平腔
攔牛驚魂
人類个好朋友斯係狗
𠊎相信當多人輒輒聽著抑係䀴著摎狗有關个真實故事
毋過除了狗以外，人類个好朋友斯係牛
以前臺灣係農業社會，莊下人大部分係耕種
因為科技無發達，步步愛靠人力
所以逐家屋畜牛斯係當平常个事情
大牛愛犁田、拖車、載殼、 載菜、載禾稈，這兜當重个事頭
都愛靠牛來完成
牛摎人斯像兄弟姐妹共樣，乜係屋下个一丁
...
饒平腔
阿姆个菜園角
阿姆个菜園角，有一頭葉仔花
該葉仔花，原本單淨係一細截个樹枝仔，分人細心細意个插在菜園角
佢像種佢个人共樣恁牛，毋驚熱天發風搓、毋驚天公做大水，做佢緊生緊高、緊大緊靚
到佢有半人恁高个時節
阿姆就去斬幾支仔堅韌个桂竹，插在佢脣頭分佢递
佢緊递緊暢、緊递緊高，递到屋簷恁高
不時開到滿樹，桃紅色个花
探得著屋簷个花，還毋甘願，像係自家會尋路樣仔，又續等递
递到二樓阿姆間房个窗門前，還知好莫遮著阿姆个窗門
...
饒平腔
遮仔
無聊个落雨天，一個人無落無著
企在門前䀴等街路町擎等遮仔上上下下个人
有帶走帶走緊搐搐仔个，也有定定仔行享受雨中散步个
有一儕人擎支遮仔孤栖、孤栖个，也有兩儕扳等肩頭共下抵一支遮仔个
𠊎心肝肚想：「一遮一世界，遮仔底下一定囥等盡多故事。」
䀴等門角企等像一條瓜个遮仔，撐開來，就係𠊎心肝肚个一蕊花
還細時節，在街路䀴著一支紅色間等青花个細遮仔
愛到奈毋得，原旦阿姆嫌忒細支抵雨毋著毋肯買
毋過䀴𠊎目汁含等，最尾還係買分𠊎
...
饒平腔
檳榔樹
還細該下，屋下田坵有種檳榔樹
對田頭到田尾一行一行種到筆直
行摎行之間有留引、排水个水壢
橫行又乜一頭一頭挷直線種，䀴起來嶄然靚
阿爸講行摎行个闊度種一丈闊，做事行路較方便
種菁仔樹退行時，兩頭之間留八尺闊
橫直闊度愛種罅來，另日樹仔大咧
葉仔摎葉仔正毋會相唚，割檳榔菁个割篙鐮正過得
每年五月份到九月份，爺哀五更早就跆起去菁園割菁仔
...
饒平腔
菜瓜
記得，阿嬤好種菜，佢喊阿爸在屋面前搭瓜棚來種菜瓜
菜瓜當會打，長透自家食毋去，還做得送分鄰舍
該兜鄰舍當愛食阿嬤種个菜瓜，又萋又甘甜
逐年正月半進前，阿嬤斯會摎自家點个菜瓜秧種落瓜棚下
佢日日用心照顧，幼幼个菜瓜秧，當遽抽高、递藤
阿嬤逐日做下會去巡菜瓜棚，驚怕正在該递个嫩芽，分風吹㪐忒
佢會細心細義同瓜藤牽轉瓜棚下，用索略略固定在
分佢好順利跋往上，兩、三禮拜過，菜瓜藤斯递到棚頂咧
五、六月，菜瓜當會開花、當會打
...
饒平腔
身影
年正過忒，春雨落無停，寒颼颼仔！
䀴等加兩日就愛開學上臺北，屋下還無半點錢，毋知愛仰結煞正好？
愐無計咧！無奈何，阿爸講來去摎阿明伯先撥兜䀴啊！
阿明伯係車頭个副驛長，月月有月給，兼開礱間
又輒輒貌炭仔請人燒，𠊎爸就係長透分佢請去燒炭个工人
該日晨早，打早七點零，雨正落過，天還濛濛，歸路濕溚溚
熟熟个路，哪有麼个心情去欣賞雨後个景致
阿爸摎𠊎背等皮箱行頭前，𠊎擐等包袱跈到後背，衫袋肚袋無兩銑錢
去到阿明伯屋下，阿明伯親暱暱行等出來
...
海陸腔
阿婆惜𠊎惜入心
風涼涼，日頭還囥在山背，𠊎斯陪阿婆去公園行路咧
公園肚，運動个人無幾多，毋過，奇怪个係，逐儕都識阿婆
「阿財嫂，出來運動哦！孫女恁乖，還得人惜哦！」
阿婆个老朋友毋會少，堵著一個問一到，阿婆笑微微盡歡喜
𠊎斯敗勢到歸朝晨面紅紅
放暑假咧，假使𠊎逐朝晨陪阿婆行路，慣勢了後，佢恁多儕應該毋會再過問正著
轉屋个路町，看著一個老伯姆渡等孫仔在廊下坐尞，該阿婆个腳尾躡啊躡
膝頭斯跈等一上一下 抋啊抋，坐在膝頭面个嬰兒仔，暢到嘴合毋密
嬰兒笑，該阿婆也笑，嘴町噥噥噥噥佢兩儕正聽得識个話語
...
海陸腔
燈籠
老頭擺，逐年正月半个燈籠節，隔壁鄰舍个細人仔，長透會湊等共下
自家來做自家个燈籠，所以，𠊎兜燈籠个材質就用該兜手町便便做得用个
有菜頭、銅笐、紙等等。𠊎最好菜頭透出來个光，該係用湯匙摎菜頭个中央挖空
當然，挖出來个菜頭還係做得煮來食，假使就恁樣掉忒，該就打爽咧
老一輩个人總係會分𠊎兜細人仔一隻觀念，做得用个抑係做得食个東西
就做毋得儘採打爽忒，假使講就恁樣摎佢攉攉忒去，這就係「折福」
燈籠做好，在暗摸胥疏个暗晡頭，儕儕手町都有一盞燈籠
擐等燈籠，遶到禾埕、田脣、竹林間、陂塘䃗，滿哪仔冒險，試著恁樣形搞當生趣
在四圍無光害个莊下肚，單淨就月光、星仔个夜色
...
海陸腔
糟嫲
見擺冬下兼過年時節，𠊎就會想起阿姆做个「糟嫲」
紅漬漬个糟嫲就像年个代言人，放勢用佢一身啾紅
還過糯米發過後个酒香，間等年下喜氣，帶來一種幸福个感覺
也係預告過年會到哩喲！枵鬼个細人仔，吂曾吂抵就頭勾勾緊望
斯望得係有隻糟嫲雞髀抑係糟嫲雞腳來喫，毋知有幾好
阿姆做糟嫲功夫一流，酒香歸屋間，佢還會用豬肉、雞肉、鴨肉……變出好食个糟嫲肉
過年時節桌頂定著會有紅紅香香又餳人食个糟嫲肉，屋下兄弟姊妹看著這盤菜
隻隻目金金走到尾都會直，無幾久大家就食到恬索索無閒好講話
手指公吮到嘖嘖滾響
...