文本一覽
文本一覽
饒平腔
燈籠
老頭擺，逐年正月半个燈籠節，隔壁鄰舍个細人仔，長透會湊等共下
自家來做自家个燈籠，所以，𠊎俚燈籠个材質就用該兜手項便便做得用个
有菜頭、銅罐、紙張等等。𠊎最好菜頭透出來个光咧，該係用湯匙摎菜頭中央个肉身部分挖空
當然，挖出來个部分還係做得煮來食，若係就恁樣掉忒，該就會打爽
老一輩个人總係會分𠊎俚細人仔一隻觀念，做得用个也係做得食个東西就做毋得儘採打爽忒
若係講就恁樣摎佢攉攉忒去，這就係「折福」
燈籠做好，大家在暗摸胥疏个暗晡頭，儕儕手項都有一盞燈籠
擐等燈籠，遶到禾埕、田脣、竹林間、陂塘䃗，滿哪仔冒險，試著恁樣形爽當心色
在四周無光害个莊下肚項，單淨就月光、星仔个夜色
...
饒平腔
糟嫲
見擺冬下偎過年時節，𠊎就會想起阿姆做个「糟嫲」
紅漬漬个糟嫲就像年个代言人，放勢用佢一身啾紅
還過糯米發過後个酒香，間等年下喜氣，帶來一種幸福个感覺
也係預告過年會到哩喲！枵鬼个細人仔，吂曾吂抵就頭勾勾緊望
斯望得係有隻糟嫲雞髀也係糟嫲雞腳來喫，毋知有幾好
阿姆做糟嫲功夫一流，酒香歸屋間，佢還會用豬肉、雞肉、鴨肉……落糟，變出好食个糟嫲肉
過年時節桌頂定著會有紅紅香香又餳人食个糟嫲肉，屋下兄弟姐妹䀴著這盤菜
個個目珠擘金金走到尾都會直，無幾久大家就食到索恬無閒好講話
手指公吮著漬漬滾響
...
饒平腔
快樂50
記得係𠊎讀高中个時節，這臺「快樂50」奧多拜就牽轉來屋下
佢係𠊎爸第一臺騎个奧多拜，之前𠊎爸个交通工具本成係騎自行車無就坐巴士
吂退休个阿爸上下班騎「快樂50」去學校，退休後去宮廟做義工，還係騎「快樂50」來來去去
「快樂50」還有一件當重要个任務，就係放尞日愛載𠊎姆去市場買菜
該量時細人仔就講「快樂50」係「買菜車」
𠊎姆生做肥擂擂，見擺䀴𠊎爸騎等「快樂50」載𠊎姆去買菜个背影
就試着佢兩儕像愛去約會樣，𠊎姆个心情應該係快樂个！
毋過「快樂50」毋知會佇毋著無？
逐擺菜買轉來，屋下人就知有好料理食哩喲！
...
饒平腔
竹凳伯姆个大手帕
歸莊頭个人䀴著佢兩公姐，通棚都喊竹凳伯摎竹凳伯姆
因為戴佢對面个妹仔、婿郎摎𠊎屋下係倆隔壁
𠊎就跈等佢兜个三個外孫喊佢兜「姐公、姐嬤」
老人家戴个細瓦屋，無禾埕、無天時坪，單淨一間屋，囥在壁籬圍牆裡背
廳下有隻棚頂，一入門个左手析，放有一隻竹樓梯
愛用著个時節，就徙正來蹶上去棚頂尋東西，平常時就等佢凴壁企在愛入灶下个門脣
論真講起來，歸大隻棚頂，除忒年下愛賣豬仔个時節正會用著个大量仔
全部都係佢兩儕愛做桌凳摎籃䉂个竹料
竹凳伯姆有一條大手帕，毋知本旦係麼个色
...
饒平腔
麻竹坑
無講無見奇，毋講你毋知，紹介一隻心色个所在
這位所，春夏秋冬，一年透天景色異靚，異餳人，無論愛䀴山景
還係愛遶山花，來這位，定著尞到歡喜歸日，毌知好轉
客家莊个麻竹坑該所在，你識聽過無？
佢在臺中市新社區，較接近和平區
偎東勢方向大甲溪个東片，安到天冷，過咧天冷橋，該大甲溪个西片
正安到麻竹坑，福興係里名，頭擺種異多麻竹，正安到麻竹坑
佢有幾闊，你知無？來舉隻例，比分你知，大臺中市个行政區域
新社區係排第二闊，本區十三里，福興斯占兩股一个面積
...
饒平腔
巡田水
對𠊎知人我起勢，屋下斯在該耕田，阿爸耕个田離水源較遠
愛「開陂作圳」，正有水做得蔭田；若係有想愛用共條圳溝水个人
斯愛共下來𢯭手開陂塘、作圳溝，圳溝用久會漏水，大家還愛共下來作圳補漏
摎圳溝整好勢，恁樣，大自家用水正會利便
愛用著這條圳溝水斯愛輪水鬮，照理講，輪到別儕用水
大家斯愛守規矩讓水分人用，最驚堵著有私心个人
會摎別儕个水偷偷壢去自家个田項
因為恁樣，輪到耕水尾田个阿爸蔭水該時，長透半夜愛去巡田水
驚怕有人會偷旱去用，自家个田斯會水毋罅蔭毋透
...
饒平腔
䀯等
在伙房項大个細人仔，總有講毋煞棚个心色事
無論份家啦、揇腰跤、也係囥人尋、烳番薯
有三五儕共下尞，該下晝又係一隻歡喜个好日仔
𠊎盡記得爽囥人尋个時節，歸伙房係𠊎兜个遊戲場
時間一到，講乜奇怪，這兜山猴仔連連續續對屋下瀉出來
上屋个阿雪嫲、下屋个阿勇、隔壁个阿明頭，還有竹園肚个阿隆仔
鬥起來兼兼仔完十儕，大家在阿公媽面前个大禾埕集合
縈拳好勢，贏个人揞等面偷笑，早就想便愛囥个所在
輸个人面就竵忒一析，心肚想這闊野野个伙房，愛對哪尋起勢
...
饒平腔
懷念阿公
還細時節跈爺哀戴到北部，該下，𠊎正讀幼稚園中班，無煩無惱个年紀
一到放尞，就會吵爺哀渡𠊎轉老屋，因為老屋有𠊎最好爽个場所——禾埕
又還做得走到闊野野个田坵搣鬼搣怪，自由自在
該時節阿公還當健，見擺𠊎兜轉到老屋，䀴著𠊎就暢到摎𠊎揇緪緪
緊講：「在屋下有乖無？去學校有聽先生个話無？」阿公知𠊎無一時閒
蠕蠕動像屎缸蟲坐毋核，番綻又狡怪个細人仔，佢最擔心个孫仔
一個立秋个臨暗仔，阿公牽等𠊎个手，行在青溜溜个田脣路項
𠊎像草蜢樣跳來跳去恬毋下來，緊想奮㪐阿公生滿老人斑又粗鱗鱗个手巴掌
阿公摎𠊎个手揢到緪緪，毋分𠊎離開佢个身邊，驚蠻皮好爽个𠊎一無細義來跌著
...
饒平腔
灶頭舊事
過年前，𠊎屋下請油漆師傅來油漆。師傅講，你个後尾門有分老鼠囓一隻大空哦！
䀴著囓壞个紗門，心肝頭一下就像著懸樣揢緪緪，氣就敨毋出
老鼠係𠊎童年个惡夢，原旦想，今這下戴高樓就毋會有老鼠，無想著道高一尺，魔高一丈
這隻老鼠魔，正經係毋想分𠊎好過年喺？
還記得該正過忒年个臨暗仔，輪到𠊎暖燒水
阿姊渡老弟、老妹去禾埕，摎伙房裡肚个細人仔，共下爽囥人尋摎踢銅罐
留𠊎一個人在灶下燒樵。掌火个事頭實在當無聊
目珠尾睞著菜櫥項有幾垤炙燥个甜粄乾，就提火鉗摎甜粄夾等用火焙
金黃色个甜粄開始結𤊶，息仔臭火煙个味緒正式餳人食
...
海陸腔
老鄰舍
戴在都市肚，隔壁鄰舍相堵頭，最多就笑笑仔、頷下頭，無麼个有相借問
就算日時頭，儕儕也閂門閉戶罕得來往，看著恁樣，𠊎特別懷念細人仔時个老鄰舍
頭擺𠊎戴在莊下个街路肚，鄰舍多，大家長下這家行行、該家尞尞
像對門做西裝个矮師傅屋下，大家就當愛去
大人會去討兜布尾布截來補衫褲，細人仔就拈兜布碎仔來份家啦仔
暗晡頭大人做閒咧，就坐在佢个店亭下尞涼、打嘴鼓
一群細人仔就在做西裝个長桌頂寫作業、讀書，就像自家屋下樣
對門還有一間阿德伯个布店，店肚花剌必駁个布，非常餳人
𠊎輒輒去看哪垤布較靚，到阿姆過家尞个時節，就拉等佢去愛剪布來做衫
...
海陸腔
還福請人客
正月十五元宵節，莊肚个媽祖廟該暗晡子時會祭拜天公來祈福
祈求保佑風調雨順、國泰民安、莊民身體康健
秋收過後，舊曆十月半邊，廟肚會舉辦盛大个祭拜儀式
來答謝各路神明保佑莊肚百姓順序平安
有祈就愛有還，這儀式𠊎兜講「還福」
還福係六堆客家莊个大事，前兩日，婦人家盡無閒，愛打紅粄
紅粄毋係斯敬神用个，還愛用紅粄去邀請嫁出去个阿姑、姑婆
還過阿姆外家頭个親親戚戚來分𠊎兜請，所以愛打當多紅粄
打粄个時節，阿姆做粄，𠊎兜細人仔愛𢯭手燒火，鑊頭水滾無幾久
...
海陸腔
雲
有一擺出國去尞，恁好彩分𠊎坐在飛行機窗門脣
該日，天氣當好，看往出，阿姆哀正得，青青个天、白白个雲──青天白雲
該強強分人毋記得个記憶，做一擺分𠊎看著咧
深深刻印在𠊎个腦膈肚，長透會出現在夢中
該雲个色彩仰會恁靚，有白白像當好食个綿綿冰、棉花糖，也有像軟軟會分人燒暖个白棉花
又有个像嬰兒恁得人惜，想愛偷唚一下佢紅霞紅霞个面頰卵
雲還有各種無共樣形投个款式，有像觀音娘坐在蓮花座頂騰雲
也有像關公手擎青龍偃月刀大戰外星人
有像高高大大个山，乜有像青堂瓦舍个屋、皇宮，還有像走當遽个車仔、馬
...
海陸腔
苦瓜个味緒
還記得𠊎做細人仔个時節，一到避暑放尞，𠊎兜六个細孲仔當好摎阿爸共下去菜園做事
𠊎爸盡樂線，一路講笑科、一路唱山歌，當快樂，連上屋个滿叔公、滿叔婆看著也跈等唱山歌
講斯有影哦，「窮人毋使多，兩斗米就會唱歌」
阿爸个菜園種當多菜，有韭菜花、湯匙白、番薯葉、茄仔、高麗菜
還有細人仔一等毋好食个苦瓜，阿爸伸手摘兩條苦篤苦篤个苦瓜放在籃肚
𢳆轉頭摎𠊎兜細人仔講：「阿秀、阿德，你看這苦瓜彎彎糾糾个紋路
就像人生个過程，坎坎坷坷，也像人生个劇本，苦苦甘甘，有特別个味緒。」
𠊎兜兄弟姊妹聽毋識，戇戇企等。阿姆在脣頭看著嗄好笑
摎阿爸講：「樹老心空，人老就顛倲。你摎十歲子講這兜，佢敢聽有？
...
海陸腔
弓蕉旗
民國四、五十年該下，𠊎个老屋戴在弓蕉市場脣頭
該弓蕉市場係青果合作社用來收貨、出貨个所在
記得該下見到插「弓蕉旗」个時節，滿哪仔个蕉農都會㧡弓蕉來這位繳
弓蕉市場个地泥下排到淰念个弓蕉
在該隻年代，若係弓蕉顧著靚，做得外銷去日本，斯拿得著較好个價數
臺灣種个弓蕉香合甜，型款靚又飽米，日本人當安𧩣，長下會對臺灣進口弓蕉
毋過日本人買弓蕉个時間無定著，載弓蕉个船期也無一定
弓蕉市場成下一禮拜有兩、三日做得收弓蕉，成下一禮拜正收一、兩日定
該下吂有電話，愛知合作社哪時會收弓蕉，有弓蕉愛繳个農民
...
海陸腔
阿公个三種身分
客家莊係阿公个胞衣跡，戴到今會八十年咧
阿太係學老人，因為食頭路个關係，就在這莊頭生根咧
阿公屋下六姊妹對細細學講話起勢，阿太就教佢兜講學老話
三、四歲以後，尋隔壁个細人仔伴尞，佢兜通棚係客人
一日到暗合啊合仔，毋使人教，無幾久斯當會唊咧，顛倒華語係讀國民學校正學个
阿公該班有外省人、學老人，乜有客人，哪種人佢都合得來
因為講話無麼个腔頭，所以斯有人問佢到底係學老人，抑係客人？
乜有人挑挑問佢係毋係「阿山仔」？阿公生來高溜高溜，面仔長刀長刀，白淨白淨
確實有外省人个形投，下後做兵、食頭路、參加各種活動，都分人有這三種身分个疑狐
...
海陸腔
時計果
尞日，摎屋下人共下去遶山花，在路脣看著有幾攤農家人在該賣自家種个菜
斯行前去遶遶看看仔，有晒到黃淰淰个筍乾、烏到出油个老菜脯
有金黃色飽米个甜包黍、浸青个竻瓜、柑紅色个黃瓜，摎生來像青色玫瑰花个高麗菜
也有嫩青个香緣瓜、各色个甜椒，還過有特殊香氣个山當歸、山胡椒
這兜又靚又萋个菜，像在該相賽擛手愛餳人去買
菜攤頭前，還有用紅色細網袋張到一袋一袋个時計果
該深茄色帶有細黃點个外皮，還略略仔皺皺，恬恬等等曉得欣賞佢个有緣人
想起細人仔該時，食雜無這下恁豐湧，一擺放尞
阿哥湊𠊎摎老弟共下去大圳背个竹園肚拈野生个時計果
...