文本一覽
文本一覽
海陸腔
灌煙腸
臘月，再過加無一隻月就係過年咧！
物質缺乏个年代，愛食無恁利便，家家戶戶係有閒，總係會利用這過年前
準備兜過年會用著个年貨，做兜臘肉、豬膽肝，其中最餳人个就係煙腸
在臺灣南部六堆地區，到年下時節，雨水少、日頭本本像熱天恁烈
這時，係來做臘肉無斯灌煙場最好个時節。因為田事這下較少咧
阿婆盡好在這段日仔，加減做兜臘肉摎煙腸，好在過年該時有豐沛个菜色
𠊎當好摎阿婆𢯭手灌煙腸，好搞又好食
該兜灌好个煙腸又做得放盡久，等到開學愛讀書个時節，帶飯包又做得有好加一項菜
灌煙腸該時，阿婆除了會先摎賣豬肉个鏡福叔公割幾斤後腿肉，佢乜會加割一息肥肉
...
海陸腔
祕密基地
逐年冷天，𠊎會去行屋後背个一條山路，這條山路頭站打紅毛泥
看起來就像一條普通个產業道路定，無麼个見奇
毋過，蹶上山峎頂，變到泥路以後，這條山路黏時就轉成𠊎个祕密基地
見擺行落這位，𠊎歸隻人就變到非常鬆爽
這條路分大樹摎竹仔遮塞塞，晒毋著麼个日頭
地泥下舖淰淰跌下來个樹葉摎竹 葉，有兜樹仔、竹仔橫在路徑頭
有兜石碫摎路脣个石䃗落忒咧，歸條路看起來就知無麼个人行
這下，會行這條路个，大體就係䟓䟓來行山路運動个人
𠊎來這，除忒運動以外，還做得感受這遍山林个恬靜
...
海陸腔
田頭田尾齣事多
「唧唧唧、唧唧唧」麼个東西噭唧唧？土狗仔？草蜢？𠊎輕手輕腳行兼去
誒！佢兜嗄禁聲咧，電線頂高个屋簷鳥相等𠊎，又乜恬索索！
仰般講呢，𠊎毋係人客，嗄有該攪躁著人个敗勢心情
另聲一喊：「阿爸，𠊎轉來咧！」聲一出，嗄來嚇走一陣鳥仔
臨暗仔个日頭，柔柔仔閃到山背去，留著晚霞滿天，靚到奈毋得哦！
屋脣个兩夫田係祖產，這下已好價，毋過阿爸毋盼得賣忒
用天然个方式，阿爸年年蒔田收穀，挨个精米、糙米
戴城市个阿叔、做生理个阿伯、阿姑、叔婆，做下分有份
田脣、田角阿婆斯會加減種兜菜，因為田肚長年無洩藥仔
...
大埔腔
老鄰舍
戴在都市肚，隔壁鄰舍相堵頭，盡多斯笑笑、頷下頭等，無麼个相借問
準講係日時頭，逐儕乜門閂緪緪罕得有來往，看著恁泥，𠊎特別懷念做細人該下个老鄰舍
頭擺𠊎戴在莊下个街路肚，鄰舍多，大家長在這家行行、該家尞尞
像對門做西裝个矮師傅屋家，大家都真愛去
大人會去討兜布尾布截來補衫褲，細人斯拈兜布碎來份家啦
暗晡頭大人做閒咧，會在厥店亭下尞涼、打嘴鼓
一陣細人斯伏在做西裝个長桌頂，寫作業、讀書，斯像在自家屋家个樣
對門還有一間阿德伯个布店，店肚花蘿必駁个布，已餳人
吾這兜輒輒去看哪垤布較靚，到阿姆過家尞該下，斯揪緊佢去剪布做衫
...
大埔腔
還福請人客
正月半元宵節，莊肚个媽祖廟該暗晡子時，會祭拜天公來祈福
祈求保佑風調雨順、國泰民安，莊民身體康健
秋天收成過後，舊曆十月半邊，廟項會舉辦大型个祭拜儀式
來答謝各路神明保護莊肚百姓順勢平安
有祈斯有還，這儀式吾等講「還福」
「還福」係六堆客家莊个大事，前兩日，婦人家已無閒，愛做紅龜粄
紅龜粄毋係單淨敬神用，還愛用紅龜粄去邀請嫁出去个阿姑、姑婆
還有阿姆妹家頭个親親戚戚來分吾等請，因致愛做當多紅龜粄
阿姆打粄个時節，吾等細人愛𢯭手掌火，鑊頭水滾無幾久
...
大埔腔
雲
有一擺出國尞，恁好運𠊎坐在飛行機窗門脣
該日，天時當好，對窗門看往出，阿姆哀正得，青青个天、白白个雲──青天白雲
該硬硬分人毋記得个記憶，這滿做一擺分𠊎看著咧
深深刻在吾个腦膈肚，三不二時會浮現在夢中
該雲个色彩仰脣會恁靚～，有白白像餳人食个綿綿冰、棉花糖，也有像軟軟會分人燒暖个白色棉
有兜像得人惜个嬰兒面， 分人忍毋核想愛偷唚厥該紅霞紅霞个面頰卵
另外還有各種無共樣款式个雲，有像觀音娘坐在蓮花座上騰雲
也有像關公手擎大關刀大戰外星人
有像高高个大山嫲，乜有像青堂瓦舍个屋、皇宮，還有像走當遽个車、馬
...
大埔腔
苦瓜个味瑞
記得𠊎還做細人个時節，一到暑假放尞，吾等六個細人斯愛跈阿爸共下去菜園做事
吾爸係已樂暢个人，一路笑科、山歌躪無停，上屋个屘叔公、屘叔婆聽著也跈緊和過來
正經有影哦，「匱人毋使多，兩斗米斯會唱歌」
阿爸个菜園種當多菜，有韭菜花、湯匙菜、番薯葉、吊菜、高麗菜
還有細人一等毋好食个苦瓜，阿爸伸手摘著兩條味瑞苦督苦督个苦瓜放入籃肚
翻轉頭同吾等講：「阿秀、阿德，你看這苦瓜彎彎翹翹个紋路
斯像人生个過程礫礫矻矻；特別个味瑞，斯係人生个劇本，苦甘苦甘。」
吾等這兜兄弟姊妹聽毋識，戇戇企核
阿姆在邊脣看著嗄好笑同阿爸講：「樹老心空，人老顛𢛔。你同十歲子講這兜，厥等敢聽有？
...
大埔腔
弓蕉旗
民國四五十年該下，吾老屋戴在弓蕉市場脣項
該弓蕉市場係青果合作社用來收貨、出貨个所在
記得該下見若看著「弓蕉旗」个時，滿哪个蕉農做下會㧡弓蕉來這位繳
弓蕉市場个地泥下擺淰念个弓蕉
在該個年代，弓蕉若顧來靚，使得外銷去日本，價數斯加已好
臺灣種个弓蕉，型款靚又飽米，香氣足甜度罅，日本人當阿𧩣，第一優先對臺灣進口弓蕉
毋過日本人買弓蕉个時間無定著，載弓蕉个船期也無定期
弓蕉市場成半下一禮拜有兩、三日收弓蕉，成半下一禮拜正收著一、兩日忒等
該下吂有電話，愛知合作社哪時會收弓蕉，有弓蕉愛繳个農民
...
大埔腔
阿爹个三種身分
客家莊係阿爹个胞衣跡，戴到今會八十年咧
阿太係學老人，因致食頭路个關係，斯在這莊頭生根
阿爹屋家有六姊妹，自學講話起勢，阿太斯教學老話
三、四歲時節，尋隔壁个細人伴搞尞，厥等做下係客人
一日到暗攞啊攞，毋使人教，無幾久斯已會呷咧，顛倒華語係讀國民學校正學个
阿爹班項有外省人、學老人，也有客人，哪種人佢都攞合得
講話無麼个腔頭，因致斯有人問佢到底係學老人，抑係客人？
也有人挑知問佢係毋係「長山」？阿爹生來高大，面刀長長，白淨白淨
確實有外省人个形投，過後做兵、食頭路、參加各種活動，都分人有這三種身分个疑狐
...
大埔腔
時計果
尞日，同屋家人共下去遶山花，在路脣看著有幾攤農家人在賣自家種个菜
行前去看看，有晒去蠟黃个筍干、烏都出油个老菜脯
有金黃色飽米个甜包黍、浸青个竻瓜、柑紅色个黃瓜、生來像青色玫瑰花个高麗菜
嫩青个香緣瓜、各色个甜椒，還過有特殊香氣个山當歸、山胡椒
這兜又靚又萋个菜像在相拚，擛手愛餳人去買
菜攤頭前，還有用紅色細網袋裝核一袋一袋个時計果
該深吊菜色帶有細黃點个外皮還略略皺皺，恬恬等識貨欣賞佢个有緣人
愐起細漢个時，食雜無這下恁豐湧，一擺尞涼
阿哥湊𠊎同老弟共下去大圳背竹林肚拈野生个時計果
...
大埔腔
灌煙腸
臘月，毋使過一個月斯過年咧！
物資毋足个年代，愛食無恁利便，家家屋屋若係有閒，總會利用過年前
準備兜過年會用著个年貨，晒兜臘肉、豬膽肝，其中盡餳人个斯係煙腸
在臺灣南部六堆地區，到年下，雨水少、日頭本本還像熱天恁烈
這下，若來做臘肉、抑係灌煙腸係盡好个時節。因致田坵這下事較少
阿奶會在這站時間，加減做兜臘肉同煙腸，在過年个時節正有豐沛个菜色
𠊎盡好同阿奶𢯭手灌煙腸，好搞又好食
該兜灌好个煙腸使得放當久，等到開學讀書个時節，帶飯包斯有好加一項菜
愛灌煙腸个時節，阿奶會先同豬砧个鏡福叔公買幾斤後臀肉，另外也會加買兜肥豬肉
...
大埔腔
祕密基地
逐年寒天，𠊎會去屋背个一條山路行，這條山路頭站打紅毛泥
看䟘來係一條真普通个產業道路等，無麼个見奇
毋過，跋上山崠頂，變做泥路了後，這條山路黏時斯轉做吾个祕密基地咧
見擺行入這位，𠊎歸個人斯試著已鬆爽
這條路分大樹同竹遮塞塞，晒毋著麼个日頭
地泥下舖淰淰跌落來个樹葉、竹葉，有兜樹、竹橫在路徑頭
有兜石碫同路脣个石䃗落撇咧，歸條路看䟘來無麼个人行
這下，會行這條路个人，大體都係䟓䟓來行山路運動个人
𠊎來這項，除了運動以外，還使得感受著這片山林个恬靜
...
大埔腔
田頭田尾齣事多
「唧唧唧、唧唧唧」麼个東西噭唧唧？土狗？草蜢？𠊎輕手輕腳行偎去
誒！厥等嗄禁聲咧，電線頂高个瓦雀相緊𠊎，又乜恬芍芍！
仰脣講諾，𠊎毋係人客，嗄有該攪杈著人个敗勢心情
另聲一喊：「阿爹，𠊎轉來咧！」聲一出，嗄來嚇走一陣鳥
臨暗个日頭，柔柔閃到山背去，留著霞痕滿天，靚都耐毋得哦！
屋脣个兩坵田，係祖產，這下已好價，毋過阿爹毋盼得賣撇佢
用天然个方式，阿爹年年蒔田收穀，挨个精米、糙米
戴城市个阿叔、做生理个阿伯、阿姑、叔婆，做下分有份
田脣、田角阿奶斯會加減種兜菜，因致田坵長年無射藥
...
四縣腔
老鄰舍
戴在都市肚，隔壁鄰舍相堵頭，盡多就笑笑仔、頷下頭，無麼个有相借問
就算日時頭，儕儕也閂門閉戶罕得來往，看著恁樣，𠊎特別懷念細人仔時个老鄰舍
頭擺𠊎戴在莊下个街路肚，鄰舍多，大家長下這家行行、該家尞尞
像對門做西裝个矮師傅屋下，大家就盡愛去
大人會去討兜布尾布截來補衫褲，細人仔就拈兜布碎仔來份家啦
暗晡頭大人做閒吔，就在厥店亭下尞涼、打嘴鼓
一群細人仔就坐在做西裝个長桌頂寫作業、讀書，就像自家屋下樣仔
對門還有一間阿德伯个布店，店肚花剌必駁个布仔，當餳人
𠊎兜輒輒去看哪垤布仔較靚，到阿姆過家尞該下，就拉等佢去剪布做衫
...
四縣腔
還福請人客
正月半，莊肚个媽祖廟在該暗晡个子時會祭拜天公來起福
祈求保佑風調雨順、國泰民安，莊民身體康健
秋收過後，舊曆十月十五邊仔，廟項會舉辦盛大个祭拜儀式
來答謝各路神明保佑莊肚百姓順序平安
有起就愛有還，這儀式𠊎兜講「還福」
還福係六堆客家莊个大事，前兩日，婦人家盡無閒，愛打紅粄
紅粄毋係淨敬神用定定，還愛用紅粄去邀請嫁出去个阿姑、姑婆
還有阿姆外家頭个親親戚戚來分𠊎兜請，故所愛打當多紅粄
打粄仔个時節，阿姆打粄仔，𠊎兜細人仔愛𢯭手燒火，鑊頭水滾無異久
...
四縣腔
雲
有一擺出國去尞，恁好彩分𠊎坐在飛行機窗門脣
該日，天時當好，看往出，阿姆哀正得，青青个天、白白个雲──青天白雲
該強強分人毋記得个記憶，做一擺分𠊎看著哩
深深刻印在吾个腦膈裡肚，不時會出現在夢中
該雲个色彩仰會恁靚！有白白像當好食个綿綿冰、棉花糖，也有像軟軟會分人燒暖个白棉花
有个像嬰兒仔恁得人惜想愛偷唚一下厥紅霞紅霞个面頰卵
還有各種無共樣形投个款式，有像觀音娘坐在蓮花座上騰雲
也有像關公手擎青龍偃月刀大戰外星 人
有像高高大大个山仔，乜有像青堂瓦舍个屋仔、皇宮，還有像走當遽个車仔、馬仔
...