文本一覽
文本一覽
南四縣腔
麻竹坑
無講毋見奇，毋講你毋知，紹介一個生趣个所在
這位，春夏秋冬，一年透天都盡靚，盡餳人，無論愛看山景
還係愛遶山花，來這位，定著分你開容笑面，歡喜靂天，毋知好歸
客家莊麻竹坑該跡，你識聽過無
佢在臺中市新社區，過接近和平區
兼轉東勢方向大甲河个東片，安到天冷，過吔天冷橋，大甲河个西片
正安到麻竹坑，福興係里名，頭擺仔種盡多麻竹，正安到麻竹坑
佢有幾闊仔你知無？來舉個例仔分你知，大臺中市个行政區
新社區个闊就排第二，本區十三里，福興就占兩股一个面積
...
南四縣腔
巡田水
對𠊎知人我起勢，屋下就在蒔田，阿爸耕个田離水源過遠
愛「開陂作圳」，正有水使得蔭田；係有想愛用共條圳溝水个人
就愛共下來𢯭手開陂塘、作圳溝，圳溝用久會漏水，大家還愛共下來作圳補漏
同圳溝整好勢，恁仔，大家用水正會利便
愛用著這條圳溝水就愛輪水鬮，照理講，輪著別儕用水
大家就愛守規矩讓水分人用，盡驚堵著有私心个人
會同別儕个水偷偷仔挖去自家个田項
因致恁仔，輪著耕水尾田个阿爸蔭水个時節，長透半夜愛去巡田水
驚怕有人會偷旱去用，自家个田就會無罅水好蔭
...
四縣腔
䀯等
在伙房畜大个細人仔，總有講毋會煞棚个生趣事
無論搞家啦飯仔、揇腰跤抑係庰人尋、熰番薯
有三五個人共下尞，該下晝又係一個歡喜个好日仔
𠊎盡記得搞庰人尋个時節，歸伙房係𠊎等搞尞个所在
時間一到，講乜奇怪，這兜山猴仔一個一個對屋下瀉出來
上屋个阿雪嫲、下屋个阿勇、隔壁个阿明頭，還有竹園肚个阿隆仔
鬥起來兼兼仔有十個人，大家在廳下面前个大禾埕集合
猜拳好勢，贏个人揞等面偷㖸，早就想便愛庰个所在
輸个人面就竵核一析，心肚仔愐這闊野野个伙房，愛對哪尋起勢
...
南四縣腔
懷念阿公
還細時節跈爺哀歇啊北部，該下仔，𠊎正讀幼稚園中班，無煩無惱个年紀
一到放尞，就會吵爺哀帶𠊎歸老屋，因為老屋有𠊎盡好搞个場所——禾埕
又還做得走到闊野野个田坵仔搣古搣怪，自由自在
該時節阿公還蓋健，見擺𠊎等歸到老屋，看著𠊎就暢到同𠊎揇緪緪
緊講：「在屋下有乖無？去學校仔有聽先生个話無？」阿公知啊𠊎無一時閒
蠕蠕仔動像屎蟲坐毋核，又纏又搞怪个細人仔，係佢最擔心个孫仔
一個祛秋个臨暗仔，阿公牽等𠊎个手，行在青溜溜个田脣路項
𠊎像草蜢樣仔掝掝腦跳靜毋下來，緊想奮㪐阿公生滿老人斑又粗鱗鱗仔个手巴掌
阿公同𠊎个手揢到緪緪，毋分𠊎離開厥身邊，驚啊蠻皮好搞个𠊎一無細義來橫著
...
南四縣腔
灶頭舊事
過年前，𠊎屋下請油漆師傅來油漆。師傅講，若後尾門有分老鼠囓一隻大空哦！
看著剪壞个紗門，心肝頭一下仔像著著釣樣仔揢緪緪，氣就敨毋出
老鼠係𠊎童年个惡夢，原旦想，今這下歇高樓就毋會有老鼠，無想著道高一尺，魔高一丈
這隻老鼠魔，真係毋想分𠊎好過年喺？
還記得該正過核年个臨暗，輪著𠊎暖燒水
阿姊帶老弟老妹去禾埕，同伙房裡肚个細人仔，共下搞庰人尋同踢銅罐仔
留𠊎一個人在灶下燒樵。掌火个事頭實在蓋無聊
目珠尾睞著棧櫥項有幾塊晒燥个甜粄乾，就拿火鉗同甜粄夾等用火炕
金黃色个甜粄開始結𤊶，息把仔臭火煙个味緒斷真餳人食
...
詔安腔
兩媽孫
風涼涼，日頭猶藏在山後背，𠊎即陪阿媽去公園行路啊
公園內底，運動个人無幾多，毋過，怪奇个係，逐儕攏識阿媽
「阿財嫂，出來運動哦！孫女恁乖，真得人惜哦！」
阿媽个老朋友毋會少，堵著一個問一擺，阿媽微微笑真歡喜
𠊎嗄歹勢到歸晨早面紅紅
放暑假啊，假使𠊎逐晨早陪阿媽行路，慣勢啊，佢人應該毋會擱問正著
在轉屋下个路，䀴著一個老伯㜷渡孫在巷路坐尞，遐個阿媽个腳尾竳啊竳
腳膝頭即跈在一上一下抋啊抋，坐在膝頭面上个阿佅，暢到嘴合毋會密
阿佅笑，遐個阿媽嘛笑，嘴念佢兩儕正聽會識个事
...
詔安腔
燈籠
成過，逐年正月半个燈籠節，屋邊頭尾个細子，攏會招作垺
自家來做自家个燈籠。所以，𠊎人燈籠个材料即用遐兜手脣便便會用个
有菜頭、銅笐、紙這兜。𠊎頭愛菜頭透出來个光， 遐係用湯匙拁菜頭中央个肉耬空
當然，耬出來个部分猶係會用煮來食，假使恁即拁擊莫，即傷打爽啊
老輩个人總係會得𠊎人細子一個觀念，會用用个抑係會用食个物件即毋好儘採打爽莫
假使講若恁拁抌莫，這即係「折福」
燈籠做好，大家在暗摸胥疏个暗夜時，逐個手頭攏有一盞燈籠
擐著燈籠，踅到禾坪、田脣、竹林內、魚塘脣，滿哪位去探險，感覺恁賞真心色
在四角輪轉無光害个莊下，正有月光和星光个夜色
...
詔安腔
糟嫲
逐擺在寒天偎過年个時務，𠊎即會想著阿依做个「糟嫲」。
紅漬漬个糟嫲即像年个代言人，拚勢用佢一身个紅色
猶擱有糯米發了後个酒香，合落偎年个喜氣，隨來一種福氣个感覺
嘛係預告過年討到位啊！枵鬼个細子，吂曾吂即頭勾勾直直望
望若係有一支糟嫲雞髀抑係糟嫲雞腳好喫，毋知有幾好
阿依做糟嫲个功夫一流，酒香歸屋間，佢猶會用豬肉、雞肉、鴨肉……變出好食个糟嫲肉
過年時務，桌崠定著會有紅紅香香又餳人食个糟嫲肉。兄弟姊妹䀴著這盤菜
逐個目金金，拚緊緊，無幾久大家即食到恬卒卒，無閒好講事
手指公嗍到唧唧咈
...
詔安腔
快樂50
記得係𠊎讀高中个時務，這臺「快樂50」噗仔即牽轉來屋下
佢係𠊎怙第一臺騎个噗仔，進前𠊎怙个交通工具毋係騎鐵馬即係坐巴士
吂退休个阿怙上下班騎「快樂50」去學校，退休了後去宮廟做義工，猶係騎「快樂50」來來去去
「快樂50」猶有一件真要緊个任務，即係歇睏日愛載𠊎依去市場買菜
遐睏子細子攏講「快樂50」係「買菜車」
𠊎依生做肥漬漬，見擺䀴𠊎怙騎「快樂50」載𠊎依去買菜个背影
即感覺佢兩儕若像討去約會共款，𠊎依个心情應該係歡喜个！
毋過「快樂50」毋知佇會核無？
逐擺菜買轉來，屋下人即知有好料理食啊！
...
詔安腔
竹凳伯㜷个大手巾
歸莊頭个人䀴著佢兩公姐，歸下攏喊佢人竹凳伯和竹凳伯㜷
因為蹛佢人對面个阿女、阿郎和𠊎係屋邊
𠊎即跈佢人个三個外孫喊佢人「外公、外媽」
老儕蹛个細瓦屋，無禾坪，正有一間屋，藏在竹籬門牆內底
廳下有一個棚，一入門个倒裡，有囥一支竹梯
討用个時，即徙好勢，跋起去棚崠尋物件，普通時即得佢凴壁企在灶下个門脣
論真講起來，歸大個棚崠，正年尾討賣豬个時務會用著个大量以外
歸下攏係佢兩儕討做桌凳和籃 䉂个竹料
竹凳伯㜷有一條大手巾，毋知本來係麼个色
...
詔安腔
麻竹坑
無講毋知好，毋講你毋知，拁你紹介一個心色个所在
這跡位，春夏秋冬，一年透天攏真靚，真餳人，無論係愛䀴山景
抑係愛跋山个人，來到這，定著會得你歡頭喜面，歸日，毋知好轉
客人莊个麻竹坑遐跡位，你識聽過無？
遐在臺中市新社區，較接近和平區
偎東勢方向大甲溪个東片，號做天冷，過了天冷橋，遐大甲溪个西片
正號做麻竹坑，福興係里名，成過種真多麻竹，正號做麻竹坑
遐有幾闊，你知無？來做一個例得你知。大臺中市个行政區
新社區个闊即排第二，本區十三里，福興即占一半个面積
...
詔安腔
巡田水
自𠊎知天地起，屋下即在蒔田。阿怙種作个田離水頭較遠
愛「開陂作圳」，正有水好蔭田。若係想討用共條圳溝水个人
即愛共下來鬥相共開陂塘、作圳溝。圳溝用久會漏水，大家猶愛共下來作圳補漏
拁圳溝修好勢，恁，大家用水正會利便
愛用著這條圳溝水，即愛輪水鬮。照理講，輪著別儕用水
大家即愛守規矩，讓水得人用。頭驚堵著有私心个人
會拁別儕个水偷偷引去自家个田
因為恁，輪著種作水尾田个阿怙蔭水个時，恬恬半夜愛去巡田水
驚有人會偷引去用，自家个田即會毋罅水好蔭
...
詔安腔
䀯蹛
在大落屋大漢个細子，總有講毋會煞棚个心色事
無論係辦家貨、擎攬跤、抑係點妖精、烳番薯
有三、五儕共下尞，遐下晝又係一個歡喜个好日
𠊎頭記得賞點妖精个時務，歸大落屋係𠊎人个遊戲場
時間一到，講嘛怪奇，這兜山猴陸陸續續對屋下傱出來
上屋个阿雪、下屋个阿勇、隔壁个阿明頭，猶有竹園內个阿隆
鬥起來大討有十儕，大家在公媽頭前个大禾坪集合
攘拳好勢，贏个人揞面偷笑，早即想便討藏个所在
輸个人面即撇一裡，心肝底想這闊茫茫个大落屋，愛對哪位尋起頭
...
詔安腔
思念阿公
猶細漢个時，跈爺母蹛在北部，遐睏子，𠊎正讀幼稚園中班，係無操無煩个年歲
一到歇睏日，即會吵爺母渡𠊎轉去老屋，因為老屋有𠊎真愛賞个所在——禾坪
猶擱會用走到闊茫茫个田賞遐賞這，自由自在
遐時務，阿公猶真勇，見擺𠊎人轉到老屋，䀴著𠊎即暢到拁𠊎攬緪緪
直直講：「在屋下有乖無？去學校有聽先生个事無？」阿公知𠊎無一時閒
蠕蠕動，若像屎缸蟲，坐毋會核，係牛獗擱狡怪个細子，嘛係佢頭擘心个孫子
一個秋天个烏昏，阿公牽𠊎个手，行在青溜溜个田塍路面上
𠊎像草蜢个款，若行若跳，恬毋會落來，直直想討滾絞開阿公遐攏係老人斑擱粗粗个手掌
阿公拁𠊎个手揢到緪緪，毋得𠊎離開佢个身脣，驚蠻皮擱愛賞个𠊎一無細義會跌倒
...
詔安腔
灶頭舊事
過年前，𠊎屋下請油漆師傅來油漆。師傅講，你个後背門有得老鼠咬一個大空哦！
䀴著咬壞个紗門，心肝頭一下子挶緪緪，像著著釣个款，氣硬討敨毋會出來
老鼠係𠊎細子時个歹夢，本來想講這下蹛高樓即毋會有老鼠，無想著道高一尺，魔高一丈
這隻老鼠魔，正經係無想討得𠊎好過年！
猶記得遐正過年了个烏昏，輪著𠊎燸燒水
阿姊渡阿弟、阿妹去禾坪，和大落屋內底个細子，共下賞點膨嬰和踢銅笐
留𠊎一個人在灶下燸樵。顧火个事頭實在真無心色
目珠尾睞著菜櫥內底有幾下垤炙燥个甜粄乾，即提火鉗拁甜粄夾蹛用火烘
金黃色个甜粄開始結疕，一兜仔臭火煙个味真餳人食
...
饒平腔
兩子阿嬤
風涼涼，日頭還囥在山背，𠊎斯陪阿嬤去公園行路咧
公園肚，運動个人無異多，毋過，怪奇个係，逐儕都識阿嬤
「阿財嫂，出來運動哦！孫女恁乖，還得人惜哦！」
阿嬤个老朋友毋會少，堵著一個問一到，阿嬤笑微微異歡喜
𠊎斯敗勢到歸晨早面紅紅
放暑假咧，假使𠊎逐晨早陪阿嬤行路，慣勢咧，佢恁多儕應該毋會過問正著
轉屋个路項，䀴著一個老伯姆渡等孫仔在廊下坐尞，該阿嬤个腳尾寧啊寧
腳膝頭斯跈等一上一下抋啊抋，坐在膝頭面个嬰兒，暢到嘴合毋密
嬰兒笑，該阿嬤也笑，嘴項噥哢該兩儕正聽得識个話語
...