文本一覽
文本一覽
南四縣腔
第二課
𠊎最有興趣个一門課
天公啊！落水喲！阿妹呀...
這首客家歌曲，歸班仔越唱越大聲
越唱越有興頭，這就係𠊎最好上个客語課
客語先生上課認真又古琢
毋單淨教大家唱山歌、讀諺語、念童謠
還會紹介盡有特色个客家文化
山歌好聽，諺語搭句，童謠生趣
𠊎見擺就聽到蓋入神
...
南四縣腔
第四課
書香
老一輩人因為生活清苦，無機會讀書、識字
故所無辦法吸收過多知識
一生人單淨知耕種揢泥卵
現下教育普遍，網路發達，有蓋多讀書个機會
毋過，盡多人無了解讀書个趣味同價值
𠊎等從細讀書認字，除了學校學習个教材以外
平常時乜愛多看各種課外个好書
學著各種做人做事个道理
...
南四縣腔
第三課
先生教𠊎講客話
班長：上課哩，大家遽遽坐好
阿文你去捽粉牌，先生黏皮來哩
阿文：哇！又愛上客語課哩喲
艱苦艱苦真艱苦，先生上課像老虎
學生坐等像老鼠，愛唱山歌愛跳舞
還愛用客打嘴鼓
講好客話實在還辛苦啊，還辛苦
先生，失禮，𠊎係講㖸个啦
...
南四縣腔
第五課
𠊎拚上崁哩
十二月初六 禮拜五 烏陰天
還暢喔！𠊎曉泅水哩！
做得像魚仔恁仔在水竇肚泅來泅去
前一站仔，先生講愛上泅水課
𠊎聽著就愁到食睡毋得
因為𠊎蓋無膽，盡驚水
一開始，先生教大家定定仔學
心情愛放輕鬆
...
南四縣腔
第一課
網路世界
這下係網路个時代，無論係個人、家庭抑係機關、企業
做下就會用著網路
網路無國界个限制，佢做得挷兼人同人之間个距離
帶分現代人生活蓋大个利便
今這下个人，毋使上街，用網路來買賣東西就做得
網路商店賣个物品包羅萬象
愛買東西，手指一點，貨就會寄到屋下來
愛看新聞，網路項个消息，比報紙過新又過遽
...
南四縣腔
第二課
淨俐个地球
樹叢裡背 鳥仔這片唱 該片和
唱出歸樹林个快樂
山排頂項 百花嗶剝 滿山香
細人仔逐上逐下草坪項
東風吹啊來 𠊎聽著生命个歡唱
烈烈个日頭 逐等鏡鮮个泉水
對山項到坑壢 順等河壩 流入連天个海洋
魚仔在該泅來泅去
...
南四縣腔
第三課
網路阿宅
有一儕人，無人知佢麼个名姓
淨知佢係「阿宅」
無人知佢歇在哪，乜無人知佢在哪食頭路
看著佢个時節，大概就係在網路項
阿宅平常盡恬，無麼个話講
乜盡少同人相借問，係講著佢有趣味个話頭，就講毋會煞
佢見講話，盡慣在話頭話尾加一句
「這係網友講个」、「網路項恁仔寫个」
...
南四縣腔
第四課
利便个交通網
第一幕
時間：拜六暗晡
人物：阿爸、阿姆、阿煥仔（國中三年生）、阿婷仔（小學二年生）
地點：廳下
阿煥仔：阿爸，天光日愛坐幾多點个車？愛幾早吔䟘
阿爸：𫣆俚愛坐八點个車，大概仔六點半邊仔䟘就做得哩
阿婷仔：該乜會像上擺樣仔，歸到阿婆屋下就過晝缽𤊶咧
恁仔又做得食鐵路便當咧，還好哪
...
南四縣腔
第五課
人人做得食百二
阿文牯：恁久仰仔？
你去外背讀書，一個人在人生地不熟个所在生活
上禮拜你放尞轉來，𠊎看著你面色蓋毋好
又加恁瘦，看起來懶懶，阿爸實在蓋毋盼得
你本來身體盡砸，係毋係食睡無照常，又加上凍著
無抽間去分先生看，正會恁仔
愛知有康健个身體，正有精神好讀書
身體愛好就愛從食雜、保健、醫療三方面起勢
...
南四縣腔
第六課
一個社區个營造
三月十五該朝晨，𠊎為著愛了解社區个營造
抽時間去參加桂花巷社區个剪綵活動
對實際活動个體驗同訪問，來了解社區
路項，𠊎聽一個伯姆講起桂花巷社區
上隻月正成立吔環保義工隊，摎社區个大街小巷
拚掃到淨俐淨俐
伯姆一講，𠊎正發覺著
原旦一哪仔就係垃圾个路頭巷尾，這下整理到伶伶俐俐
...
南四縣腔
第七課
恁靚个臺灣
臺灣島就像太平洋脣个一粒珍珠
在這細細的島項，看得到高山、平原、峽谷、海岸
地形多樣，景致美麗
寒、溫、熱帶林相完整，生態豐富
葡萄牙人同佢安到「福爾摩沙(Formosa)」
自古以來，原住民、客家人、學老人同新住民
在這位安身立命，開枝散葉，相扶相融，產生多元文化
陽明山个火山地形、硫磺溫泉，係活生个地質教室
...
南四縣腔
第八課
萬丈高樓從底起
有一日𠊎坐火車愛去高雄，坐啊定著
一個五十歲邊仔个男仔人，行到吾位仔面前
佢緊看𠊎，笑笑仔講
失禮！請問你係李增福先生無
係啊！你仰會識𠊎呢
𠊎臥起頭來，看等這個面烏刻烏刻仔
目珠大大蕊盡有精神、身材又高又砸
著一領灰灰个「夾克」，手項擐等一隻舊款公事包个男仔人
...
南四縣腔
第九課
樂觀自信个人生觀
世間人百百種，有人銜等金調羹出世，有人一落泥就少這缺該
人講一枝草一點露，每一個人總有一條路好行
瑞典有一個細阿妹仔，一出世就無兩枝手
加上左腳係正腳个一半長
毋過從細爺哀就同佢準正常人看
教佢愛仰仔面對困難、適應生活
發揮自家个長處，用樂觀个態度來面對人生
佢就係蓮娜‧瑪麗亞(Lena Maria)
...
南四縣腔
第十課
𠊎个生涯規劃
加一駁仔，𠊎就愛國中畢業吔
這下个心情就像老鼠跌落米缸肚，一重歡喜一重愁
歡喜个係愛畢業，準備行入另外一個階段
愁个係毋知愛讀仰仔个學校
好得這段時間，學校辦吔一系列生涯規劃个活動
對𠊎有盡大个幫助
原本𠊎對自家个生涯規劃，總係無主無意
從細阿爸就對𠊎講：「愛認真讀書
...
詔安腔
第一課
網路世界
現時係網路个時代，無論係個人、家庭抑係機關、企業
做一下攏會用著網路
網路無國界个限制，會用揪偎人和人之間个距離
帶得現代人生活真大个利便
現時个人，毋使上街，用網路來買賣東西物件即會用
網路商店賣个物品包羅萬象
討買物件，手指頭一點，貨即會寄到屋下來
討䀴新聞，網路內个消息，比報紙較新又較緊
...
詔安腔
第二課
淨俐个地球
樹叢內底 鳥仔這裡唱 遐裡和
唱出歸樹林个快樂
山排崠 百花嗶剝 滿山香
草坪面上細人仔躐上躐下
東風吹過來 𠊎聽著生命个歡唱
猛猛个日頭 躐著鏡鮮个泉水
對山內到坑子 順著溪水 流入連天个海洋
魚在遐泅來泅去
...